სამეგრელო-ზემო სვანეთის მხარეში საგანგებო სიტუაციების კოორდინაციისა და გადაუდებელი დახმარების ცენტრის 3 ახალი ადმინისტრაციული შენობა გაიხსნა. დღეიდან, მარტვილის მუნიციპალიტეტის სოფ. დიდი ჭყონის, სენაკისა და ხობის სასწრაფო დახმარების მედპერსონალი მუშაობას ახალ სამუშაო გარემოში გააგრძელებს.

საერთაშორისო სტანდარტების შესაბამისი ცენტრები სასწრაფო სამედიცინო დახმარების სპეციფიკის გათვალისწინებითაა დაპროექტებული და ადგილზე პერსონალისთვის სამუშაო და მოსასვენებელი ყველა პირობაა შექმნილი.

საქართველოს რეგიონებში საგანგებო სიტუაციების კოორდინაციისა და გადაუდებელი დახმარების ცენტრის 22 ახალი ადმინისტრაციული შენობა უკვე გაიხსნა და ამჟამად კიდევ 31 ცენტრის მშენებლობა მიმდინარეობს.

ქვეყნის მასშტაბით, სასწრაფო დახმარების ადმინისტრაციული შენობებით უზრუნველყოფის პროექტს რეგიონული განვითარებისა და ინფრასტრუქტურის სამინისტრო ადგილობრივი თვითმმართველობის ორგანოებთან ერთად ახორციელებს

დღეიდან სასწრაფო სამედიცინო დახმარების პერსონალს ხელფასი 100 ლარით გაეზარდა.

აღსანიშნავია, რომ სრულად განახლებულია სასწრაფო სამედიცინო დახმარების ავტოპარკი და პერსონალის კომფორტული სამუშაო პირობებით უზრუნველსაყოფად აშენდა და შენდება სასწრაფო დახმარების ახალი ცენტრები საქართველოს მასშტაბით.

პირველი ივლისიდან ასევე გაიზარდა სოფლის ექიმების და სოფლის ექთნების ანაზღაურება 100 ლარის ოდენობით.

ასევე, დღეიდან სოციალური აგენტების ფიქსირებული ანაზღაურება 150 ლარით, უფროსი სოციალური აგენტების ანაზღაურება კი 100 ლარით გაიზარდა.

პირველი ივლისიდან 30-ლარიანი ზრდა შეეხო 70 წელს ზემოთ პენსიონერების, შეზღუდული შესაძლებლობის მქონე ბავშვების და I ჯგუფის შშმ პირთა პენსიებს.

2020 წლის პირველი ივლისიდან მკვეთრად გამოხატული შეზღუდული შესაძლებლობის მქონე პირებს (I ჯგუფი) და შეზღუდული შესაძლებლობის მქონე ბავშვებს პენსია დამატებით 30 ლარით ეზრდებათ (ჯამში 250 ლარი თვეში).

გაზრდილი ოდენობის სოციალურ პაკეტს 40 000-ზე მეტი პირი მიიღებს.

კორონავირუსის პანდემიის პირობებში, გურია რომელიც „მწვანე რეგიონის“ სტატუსს ინარჩუნებს ტურისტების მისაღებად ემზადება. ტურისტული სეზონის დასაწყებად მოსამზადებელი სამუშაოები მიმდინარეობს დაბა ბახმაროში, სადაც დამსვენებლების კომფორტული გარემოს შესაქმნელად ინფრასტრუქტურული სამუშაოები აქტიურ ფაზაშია.

დაბაში ელექტრომომარაგების 0,4 კილოვოლტიანი ძაბვის ქსელის რეაბილიტაცია მიმდინარეობს. გამრიცხველიანების სამუშაოების დასრულების შემდეგ 2 000 კომლს ექნება მუდმივი ელექტრომომარაგება. პროექტი რომლის ღირებულებაც 2 849 000 ლარს შეადგენს მუნიციპალური განვითარების ფონდიდან ფინანსდება.

ინტენსიურად მიმდინარეობს კურორტის დასუფთავება. პროცესში ჩართულია მერიის სხვადასხვა სამსახურები, რათა დამსვენებლებს ბახმარო მომზადებული დახვდეს. ასევე იგეგმება ცენტრალური სკვერის მოწყობა და სხვა მნიშვნელოვანი პროექტების განხორციელება

ქვემო ქართლში, გარდაბნის მუნიციპალიტეტში, ზემო სამგორის სარწყავი სისტემის რეაბილიტაცია აქტიურ ფაზაშია!
აღდგენილი საირიგაციო სისტემით სოფელი სართიჭალისა და მუღანლოს მოსახლეობა ისარგებლებს.
მიმდინარე სამუშაოების ფარგლებში:
მოეწყო ახალი, მონოლითური რკინაბეტონის წყალგამანაწილებელი არხის 2500 მეტრიანი მონაკვეთი;
ჩატარდა ფილტრაციის საწინააღმდეგო ღონისძიებები, მოეწყო წყალგამშვებები;
ჩაუტარდება დემონტაჟი ძველ (ამორტიზირებულ) ღარულ არხს;
მოეწყობა მეორე რიგის წყალგამანაწილებელი არხი სიგრძით 2 კმ;
პროექტის ღირებულება 1 775 000 მლნ ლარს შეადგენს.
ჩატარებული სამუშაოების შედეგად, წყლის მიწოდება გაუმჯობესდება და რეგულარულად მოირწყვება 400 ჰექტარი სასოფლო-სამეურნეო მიწის ფართობი.
რწყვის სეზონის პარალელურად, სამელიორაციო ინფრასტრუქტურის სარეაბილიტაციო სამუშაოები უწყვეტ რეჟიმში მიმდინარეობს!

ზუგდიდში წყალარინების გამწმენდი ნაგებობის მშენებლობა მიმდინარეობს.

ამ დროისთვის დაწყებულია შიდა გზების მოწყობა.

სამუშაოებს აზიის განვითარების ბანკის დაფინანსებით 33 მილიონ ლარზე მეტი მოხმარდება.

ობიექტი ექსპლუატაციაში წლის ბოლოს შევა, რის შემდეგაც ზუგდიდის მოსახლეობას საერთაშორისო სტანდარტების შესაბამისი წყალარინების გამწმენდი ნაგებობა მოემსახურება.

ჭიათურაში რიგით 79-ე საზოგადოებრივი ცენტრი გაიხსნა.

საზოგადოებრივი ცენტრი ქალაქ ჭიათურისა და მიმდებარე სოფლების – კაცხის, მანდაეთის, ნიგოზეთის, პერევის, რგანის, გეზრულის, ვაჭევის, ზოდის, სარქველთუბნის, სვერის, ქვაციხის, წირქვალის, ხვაშითის, ჯამში, 53 000 ათასზე მეტ მოსახლეს მოემსახურება.

ჭიათურის საზოგადოებრივი ცენტრი იმერეთის რეგიონში რიგით მე-17 იქნება.

ადგილობრივი მოსახლეობა შეძლებს, კომფორტულ გარემოში ისარგებლოს სახელმწიფო და კერძო სექტორის 200-ზე მეტი მომსახურებით. მომხმარებელს ე.წ. „ერთი ფანჯრის“ პრინციპით შეუძლია, აიღოს პასპორტი/პირადობის მოწმობა, განახორციელოს უძრავი ქონების რეგისტრაცია, მიიღოს საკადასტრო გეგმა, საარქივო მომსახურება და სხვ.

ახალგახსნილ საზოგადოებრივ ცენტრში მოქალაქეებს ასევე შეუძლიათ ისარგებლონ ბეჭდური და ციფრული ბიბლიოთეკით, უფასო ინტერნეტით.

თანამედროვე სტანდარტების შესაბამისი შენობა ადაპტირებულია შეზღუდული შესაძლებლობის მქონე პირთათვის.

საზოგადოებრივი ცენტრების მშენებლობა აქტიურად გრძელდება. პროექტი ევროკავშირის მხარდაჭერით ხორციელდება.