ვანის მუნიციპალიტეტის სოფელ შუა გორაში ალექსანდრე ლილუაშვილის სახელობის სკოლას რეაბილიტაცია ჩაუტარდა და მოსწავლეები 2021-2022 სასწავლო წლიდან სრულად რეაბილიტირებულ შენობაში ისწავლიან. 400 მოსწავლეზე გათვლილი სკოლა სრულად არის აღჭურვილი ახალი ინვენტარით და ადაპტირებულია სპეციალური საგანმანათლებლო საჭიროების მქონე მოსწავლეებისთვის.
სკოლაში მოეწყო შესაბამისი სველი წერტილები და პანდუსი. ეზოში განთავსებულია ღია სპორტული მოედანი. სკოლაში ასევე რეაბილიტირდა შიდა სპორტული დარბაზი და მიმდინარეობს საბუნებისმეტყველო ლაბორატორიის მოწყობა. გარდა ამისა, მოსწავლეებს ემსახურება ტრანსპორტი ოთხი სხვადასხვა მიმართულებით. სკოლის რეაბილიტაციის ღირებულება 1 075 051 ლარს შეადგენს.
აღსანიშნავია, რომ ახალი სასწავლო წლისთვის იმერეთის რეგიონში 7 ახალი სკოლა აშენდა და 16 საჯარო სკოლას სრული რეაბილიტაცია ჩაუტარდა. ასევე, წყალტუბოში აშენდა უახლესი სტანდარტების პროფესიული კოლეჯი.
